Зографска грамота на цар Иван Александър

Зографска грамота на цар Иван Александър Автор: цар Иван Александър

Издадена през 1342 г. от цар Иван Александър на манастира „Свети Георги Зограф“ в Атон.

Оригинал (адаптиран текст)

Е҆́лма оу҆бо быстъ мановение ба҃ ѡц҃а и҆ га҃ нашего і҆исѹ҃ хрїста, ходатаиствомъ сѫщыѫ и҆ истиньныѫ прѣчистыѫ и҆ прѣблг҃ословеныѫ влⷣчцѫ и҆ бг҃ородителницѫ, на ст҃ѣи горѣ а҆́ѳѡнстѣи еже быти въ неи пристанище спс҃ениѹ въсѣкои҆ дш҃и хрїстианⸯстѣи паче же православнѣи҆, и҆ съ ѹ҆сръдиемъ прѣбѣгаѫщѻи въ неи· є҆ѫ҆же ради вины, и҆ въꙁдвигошѫ трѹдолюбеꙁнѣ мноꙃи, дѡмовы ст҃ыѫ великы и҆ дивны· цр҃ие блг҃очестивии· и҆ бѡголюбивии вєльмѫже. и҆ прѣподобнии и҆нѡ́ци. и҆ ѹ҆красїшѫ и҆ ѡ҆бѡгатишѫ въсѣко· камениемъ мнѡгѻцѣннымъ и҆ биср҃ѡмъ ꙁлатом же, и҆ срєбрѡмъ и҆ има́нⸯми и҆ инѣми правдами мнѡгыми, движимыми и҆ недвижимыми. є҆же быти въ довѻ́льство и҆ иꙁⸯѻбїлие сѫщимъ и҆ прѣбываѫщиимъ въ таковыихъ въсечестныи҆хъ и҆ бж҃естⸯвъныи{хъ} дѡмовѻхъ, поѫ҆щихъ и҆ славѧщихъ є҆дїного бг҃а въ трои́ци савимагѻ, и҆ прѣчистѫѫ и҆ въсєпѣтѫѫ є҆го матере· поминати же и҆ правѻславныѫ и҆ хрїстѻлюбивыѫ и҆ приснѻпамѧтныѫ цр҃ѧ, и҆ прочѧѫ блаженыѫ ктиторы и҆ въсѣкъ рѡдъ хрїстианскы· и҆бо, не ѿ є҆дїнѻгѻ рѡда тъчиѫ и҆ли ѿ двою̑, ѻ҆брѣтаѫт сѧ въ тѻмъ ст҃ѣмъ мѣстѣ ꙁда́теле, нѫ̏ пѻнеже ѻ҆бьщее сп҃сение въ немъ є҆стⸯ и҆́скаѫ҆щиимъ ѥ̏, ѻ҆бⸯще бѡ̏ быстъ и҆ мѣстѻ благовѻльствѹѫщиимъ· тѡ́го ради, и҆ ѻ҆брѣтаѫ҆т сѧ ꙁданиа ѿ въсѣкѻгѻ рѡда и҆ ѧ҆ꙁыка правсѻлавнагѻ· є҆же сѫтъ пръвѣе и҆ и҆ꙁрѧднѣи́шеє, гръци· блъгарє· потѡм же, сръбъє̏· рѹсси· и҆́верє· въсѣкъ же и҆матъ памѧть протївѫ свѻе҆мѹ потрѹждениꙋ, паче же ръвениѹ. въ нихъ же ѻ҆брѣтае҆т сѧ и҆ бѻжестъвныи и҆ въсечестныи дѡмъ, є҆же въ и҆мѧ пѻчитае҆мыи, ст҃агѻ и҆ славнаа́гѻ велїкѻмѫченїка и҆ пѻбѣдѻнѻсца геѡргїа, и҆ нареченныи ꙁѡгра̀фѡвъ· съ́и ѹ́бѡ, и҆ꙁдавна прѣдръжимъ є҆стъ ѿ правѻслав̾ныи҆хъ и҆ благѻчестивыхъ и҆ хрїстѻлюбивыихъ цр҃ии блъгарскыи҆хъ, дѣдъ и҆ прѣдѣдъ цртⷭ҇ва ми и҆ прилагали сѫтъ и҆ крѣпили къждѻ и҆хъ, є҆ликѻ бл҃гѻвѻлилъ є҆сть, даже и҆ дѻ црⷭ҇тва нашегѻ, ѻ своеи памѧти. ѿнелиже пакы благѻиꙁволилъ е҆стъ г҃ъ бг҃ъ мои і҆с҃ хсⸯ милостиѫ и҆ хѻдатаи҆ствѻмъ прѣчистыѫ є҆го мт҃ере· и҆ посади мѧ на прѣстолѣ блъгаръскагѻ црⷭ҇тва є҆же є҆стъ дѣдни, и҆ прѣдни црⷭ҇тва ми, прилагааше и давааше и црⷭ҇тво ми є҆лїкѻ по силѣ въ въсѣ врѣмена своа· нѫ̏ та̏ въсѣ, ни въ что же въмѣнѣа҆хѫ сѧ црⷭ҇твѹ ми, противѫ и҆ какѻ и҆мааше желание и҆ пѻпечениє и҆ ревноваше ꙃѣлѡ дн҃ъ и҆ нощъ прѻмышлѣѫ какѻ и҆ кѻе҆ѫ вещиѫ лѝ дѣлѻмъ и҆ꙁъѡбрѣсти и҆ пѻдати тѻ́мѹ въсечестноѡмѹ дѡ́мѹ ст҃го и славнагѻ великѡмѫченїка пѻбѣдѻнѻ́сца геѡ́ргїа, дѻстѻа́нїє нѣкоє, недвижимѻ и҆ неѿемлемо· и҆ понеже ꙋбо ѻ҆брѣтааше сѧ ѿнѫдъ въ дръжавѣ гръчестѣ и҆ на стримѡнѣ сѐлѻ ꙁѡвомѡе ха́нтакъ. и҆ бѣше ѻ семъ прѣдъвѣдѻмѻ црⷭ҇твѹ ми· ꙗкѻ и҆скѻмѻ бысть мнѡгажⷣи ѿ мнѡгыхъ прѣжде сегѻ врѣмене· и҆скахѫ бѡ̏ таковѻе селѡ и҆ цр҃ие бывшиї прѣжде насъ и҆ кралїе и҆ подаваахѫ и҆ мнѡго ты́сѧща, и҆ не спѻдѻбишѫ сѧ поѭтїє· бѣше же ꙋбо се̏, ꙗ҆ко мнит сѧ съмѻтрение ст҃гѻ· нинѣ оу҆бѡ црⷭ҇тво ми понеже прилежааше таковое селѡ къ достѻанїѹ то́го въсечестнаго дѡма ст҃аго и҆ славнааго вєликѡмч҃нїка и҆ побѣдоносца геѡргӥа, прѣложивъ на щедрѡты бж҃иѫ и҆ прѣчистыѫ е҆гѻ матере· и҆ на хѻдатаитвѻ и҆ пѻмощь ст҃аго, ѥще же и҆ на и҆стиннѫѫ и҆ нелицемѣрнѫѫ любѻвъ е҆же имѣше црⷭ҇тво ми съ прѣвысокыи҆мъ цр҃емъ гръцкыимъ въꙁлюбенымъ братомъ и҆ сватомъ црⷭ҇тва ми киръ а҆ндрѻнїкѻмъ палеѻлогѻмъ даже и҆ дѻ съмр҃ти е҆гѻ҆· и҆ по съмр҃ти е҆гѻви пакы, не иꙁмѣни сѧ црⷭ҇тва ми любѡвъ· нѫ паче ѹ҆сѹгѹби тѫ̏ и҆ на сн҃а є҆го, прѣвысокаго цр҃ѣ гръкѡмъ калѻі҆ѡанна палеѻлѻга· въꙁлюбенагѻ а҆непсеа и҆ свата црⷭ҇тва ми· є҆го же дѣлⸯма, и҆ дръꙁновениє҆мъ посла къ немѹ црⷭ҇твѻ ми и҆ проси е́мѹ такѻвѻе селѻ ꙁовѻмѻе хантакъ на имѧ ст҃аго и҆ славнагѻ великѡмч҃нїка и побѣдонѻсца геѡ́ргїа, є҆же и҆ быстъ абїе беꙁ въсѣкѻгѻ прѣкѻслѻвїа и҆ прѣрѣканиа паче же съ любовиѫ. и поададе таковое селѡ ꙁовомое хантакъ въ вѻли црⷭ҇тва ми· имже ѻбраꙁомъ проси е҆ црⷭ҇тво ми· не нѫждно нѣкакѻ ни прикрывено, нѫ҆ по любови· и҆ ꙗ҆ко блг҃ѻчестивъ и҆ прѣвысокъ цр҃ъ, вънѧтъ и҆ подаде такѻвѻе селѻ съ въсѣмъ прилежаниемъ и правдами егѻ, блг҃оволенїемъ своимъ въ слѹхъ и҆ ꙗвленїе въсего цртⷭ҇ва е҆гѻ, и҆ съ ꙁлатопечатнымъ словѡмъ црⷭ҇тва е҆го, е҆же быти неѿстѫпимѻ и҆ неѿемлемѡ, ѿ вьсечестнагѻ прѣбываниа стг҃ѡ и славнагѡ велїкомⷱ҇нка и҆ побѣдоносца геѡ҆ргїа· прошениа ради и҆ хѻтѣниа црⷭ҇тва ми· ѥ҆́ще же и҆ ѻ пѧтьдесѧтихъ перпирѣхъ е҆же ꙁадѣваахѫ стѧжаниѡмь тѻ́го въсечестнаго прѣбываниа и҆ вꙁимаахѫ ради житарьства и҆ горнины и҆ градоꙃиданиа, и тыѫ повелѣ ѿсѣщи сѧ и҆ не вꙁимати сѧ ни до єдїноѫ чѧты, донелиже бѫдетъ и прѣбываетъ въсечестныи дѡмъ реченыи· и҆ понеже такѻвѻмѹ и҆ иꙁдавна желае҆момѻу и҆ добрѻѡмѻу прошенїѻу спѻдѻби сѧ приѧти црⷭ҇вⷮо мⷩ҇· Благои҆ꙁволи и҆ црⷭ҇твѻ ми· и҆ иꙁдаватъ настоѫщее ꙁлатопечатное СЛО́ВѠ црⷭ҇тва ми· и҆мже и ꙁаповелѣватъ црⷭ҇тво ми· и҆мѣти и҆ ѻ҆бъдръжати ꙗ҆вленнѻѡмѹ монастирю црⷭ҇тва ми реченное҆ селѡ, ха́нтакъ, бес крамолы весма непотъкновенно и҆ непокѻлѣблемо и неѿемлемѻ· съ въсѣкымъ прилежанїемъ и҆ прибыткѻмъ е҆гѻ ѥ҆ще же и҆ не ꙁадѣвати сѧ стѧжаниѡмъ тѻгѻ въсечестнагѻ монастирѣ ꙁа пѻдаание реченныимъ пѧтьдесѧтимъ перпирѣмъ, ѧ́же даваахѫ ради житарства и҆ горнины и҆ градѻꙃиданиа· понеже ѿпрѻси и҆ сихъ црⷭ҇тво ми, ꙋ прѣвысѻкаго цр҃ѣ гръческаго калѻі҆ѡа́нна палеѻлѡга, въꙁлюбенагѻ а҆неѱеа и҆ сва́та црⷭ҇тва ми· и҆ такѻ и҆матъ быти непѻтъкнѻвенно, крѣпѻстиѫ и҆ силѡѫ настоѫщагѻ ꙁлатѻпечатнагѻ СЛО́ВА црⷭ҇тва ми· и҆ да ѻ҆бладѹѫ҆тъ и ѡбъдръжѧтъ прѣпѻдѻбнии і҆нѡци е҆же въ ѻградѣ ст҃аго и славнаго великѡмѫченика и побѣдонѻсца геѡргїа, наⷣ реченныимъ селѡмъ бес крамолы весма непѻтъ{к}нѻвенѻ и неꙁыблемо, съ въсѣмь прилежѣниемъ и҆ прибыткѻмъ є҆гѻ· ѻ҆баче ни ꙁадѣвати ктѻ стѧжанїѡмъ тѻго въсечестнагѻ монастирѣ ꙁа подаание пѧтьдесѧтимъ перпирѣмъ· пѻнеже ꙗ҆ко вышеꙗвленнѻ быстъ, ѿпроси ихъ црⷭ҇тво ми съ прочими прошении свѻими· и҆ ѹ҆вѧꙁа· и҆ ѹ҆твръди· и҆ ѹкрѣпи· блг҃овѻление҆мъ ба҃ ѡ҆́ца̀ и҆ га҃ нашегѻ і҆исѹ́ хрїста· и҆ ходатаиствомъ прѣчистыѫ бц҃ѫ· и҆ пѻмѻщиѫ ст҃го и҆ славнагѻ великѡмч҃нїка и҆ побѣдѻнѻсца, геѡ́ргїа, є҆ликѻ пѻ силѣ· пѻнеже да приѻбрѧщет сѧ и҆ црⷭ҇тво ми въ тѻмⸯ ст҃омъ мѣстѣ, ꙗ҆коже и прѻчии҆ правѻславнии и блг҃ѻчестивни цр҃ие, дѣди и прѣдѣдї црⷭ҇тва ми· тѻ́го бѻ ради и҆ быстъ ꙁла́топечатнѻе СЛО́ВО црⷭ҇тва ми и҆ посланѻ быстъ· мцⷭ҇а мартїа· на всѣкѻ ꙋтвръждение иꙁвѣстое· в лѣто ҂ѕ҃.ѡ҃ н҃. і҆ндїктїѡ́ны десѧтиѫ· въ неже и наша благѻчестиваⷶ҇ и· бг҃опронареченнаа, наꙁнамена дръжава, †

† Ї҆Ѡ҃ ВЪ ХА҃ БА҃ ВѢРЕНЪ ЦР҃Ь И САМѠДРЬЖЕЦЬ ВСѢМЪ БЛГАРѠМ АЛЕѮАНⷣРЪ †

Източници

• Regel, W., Kurtz, E., Korablev, E. Actes de l’Athos, IV. Actes de Zographou. Т. 13. 1907. с. 165 – 168.
• Ильинский, Григорий Андреевич. Грамоты болгарских царей. Москва, 1911. с. 21-23, 166.
• Иванов, Йордан. Български старини из Македония. Фототипно издание. БАН, 1970. с. 587.